10: Ó, göfuga grein á hinu guðdómlega tré…

Ó, göfuga grein á hinu guðdómlega tré! Endalausar annir og ófyrirsjáanlegar breytingar hafa tafið svar við bréfi þínu. Þú fyrirgefur þetta án efa því að skyldustörf mín eru þess eðlis að þeim verður ekki með orðum lýst. Þrátt fyrir þetta, lof sé Guði, er ‘Abdu’l‑Bahá í stöðugum samskiptum við hinar heiðvirðu greinar á Hinu helga tré vegna þeirrar djúpu ástar sem ég ber í hjarta mínu til Hinnar upphöfnu fegurðar – megi lífi mínu verða fórnað Honum.

Lof sé Guði að byggingu neðri hæðar hins helga grafhýsis er lokið af fullum krafti, þokka og fegurð. Það var stór landspilda í brekkunni fyrir ofan helgidóminn. Hefði hún verið áfram í höndum ókunnugra gætu þeir hafa reist þar byggingar í framtíðinni sem myndu leiða til mikilla erfiðleika. Aftur og aftur var þetta land blessað með fótsporum Bahá’u’lláh. Þar stóðu nokkur kýprustré og Hin blessaða fegurð – megi lífi mínu verða fórnað ástvinum Hans – sat oft í forsælu þeirra meðan átrúendurnir voru í návist Hans. Þetta land þurfti einnig að kaupa fyrir skemmstu á tvö þúsund túmana og það var tengt umhverfi helgidómsins á Karmelfjalli.

Um vatnsþróna er það að segja að áður en gerð hennar hófst var þessi þjónn í fangelsi. Evrópsku og tyrknesku verkfræðingunum tókst ekki að tryggja að mannvirkið væri nógu traust og vandað og luku ekki störfum sínum. Þess vegna hrundi þróarveggurinn sem snýr að hafinu og vinnan fór að nokkru leyti forgörðum. Enginn skaði var þó skeður, því nú er verið að reisa traustan vegg undir eftirliti þessa þjóns og því verki mun brátt ljúka. Þótt ég hafi ekki getað farið sjálfur að helgidómnum vegna fangelsisvistarinnar, hef ég haft eftirlit með byggingarframkvæmdum úr fjarlægð. Þeim lýkur brátt með traustum og farsælum hætti. Reyndar er þetta ekki vatnsþró heldur útsær!

Og hvað varðar heimsókn laufsins helga á hinu blessaða tré: Ef Guð leyfir verða kringumstæður brátt hentugar og þá verður leyfi veitt. Þér fylgi heill og árnaðaróskir.

Skýringar
- Vísun til Afnán, ættingja Bábsins.
- Vatnsþróin sem tengist grafhýsi Bábsins.

Skýringar